今日約左丫妹去magabox溜冰，去之前就去左附近行下。
入到交易中心，好清靜，原本諗去邊食，
望到有野放題都幾抵，就突然好想食。
個放題有啲特別，壽司、刺身、小食同埋野飲就任飲任食，
但主菜只可以㨂一樣，選擇有八款左右，
有海鮮丼、銀鱈魚、牛肉同天婦羅之類。
我就揀左安格斯牛肉，要六成熟既。
上枱發現啲牛肉真係六成熟左右，同埋啲份量都唔算少，
因為牛肉下面仲有啲牛肉，但就係肉質偏肥既部分。
望到個醬，有位女侍應介紹話係芥末籽醬黎，
牛肉配呢種醬料入口幾惹味，幾夾，亦都唔似芥末咁會攻鼻。
丫妹就點左帆立貝海膽丼，一上枱就覺得幾有驚喜。
一黎帆立貝大大塊，比我地一般食開既大啲，完全唔係hea做，
二黎，丫妹話啲海膽好味，食得出係日本馬糞既，
因為食落幾鮮甜，所以呢間既放題都幾有驚喜。
食食下，沙律個啲兩份胡麻豆腐同角切魚生沙律就跟埋上枱，
但估唔到啲沙律份量會咁多，
原本以為會細細碗，點知成盆，有啲喊笑不得。
但啲菜食落清脆同乾淨，啲胡麻醬同埋啲魚生都唔少，無剋扣到，唔錯！
之前點左既刺身拼盤就黎左，
有甜蝦、三文魚、油甘魚同八爪魚咁，
總之全部都點左啲黎試下。
賣相都幾吸引，因為有埋啲類似海草既做裝飾，
仲有檸檬同芥末係度。
至於份量方面，啲刺身都大件，尤其啲三文魚同八爪魚，
甜蝦數量亦都有比足，有十幾隻係度。
壽司方面，就點左玉子、蟹籽、帆立貝同北寄貝四種。
味道方面真心唔差，同埋唔會勁多飯，
反而啲配料多於飯，尤其蟹籽，啲份量勁多，
一食落口就卜卜聲，勁多！
玉子都唔差，完全遮過哂啲飯！
而啲北寄貝都幾特別，入面有加芥末係度，
諗起獎門人既辣辣壽司邊個食。
最後都點左唔少小食，諗住咩都試哂，
例如日式蒸蛋、芝士年糕、芝麻雞翼、枝豆、厚燒牛舌同埋雞軟⻣。
咁多款當中，我丫妹就最鍾意食芝士年糕，
因為佢話芝士年糕都幾難整，難得有間整得唔錯，
仲要啲芝士唔係咸既，都甜甜地，食完再追加添。
牛舌亦都配有安格斯牛肉既芥末籽醬，
睇黎呢款醬應該好岩配牛肉。
Drink ~
整體黎講，呢間餐廳食得過。
首先一人都係平均二百，而食物質素又唔低，仲要啲服務幾好，
尤其係比埋免費六十分鐘上網，值得一試。
鳴門割烹料理
九龍灣宏照道33號國際交易中心2樓2號舖
沒有留言:
張貼留言