—兔兔點評—平民價高質素特色泰國茶

​

旺角都有幾間出名嘅泰國餐廳，

今次就去咗一間係新之城附近嘅餐廳，

喺地鐵站行出去唔使3分鐘，地方都幾容易搵，

雖然睇落樓下細細，原來仲有樓上，

行樓梯上去個場都幾大，有少少似茶餐廳。

餐牌當中大部份都係泰國食品及飲品，好少fusion野，整體比較正宗。

黃咖喱牛腩煲＄88

牛腩大部份都係有少少肥肉，骨膠原有彈性，

炆得幾稔，黃咖喱比想像中冇咁辣（因為本身寫明係辣嘅），

基本上就算唔食得辣都可以叫，唔會標晒汗或者流眼淚。

裏面仲有好多椒，令個菜式唔會咁悶，牛腩份量都幾多。

泰式鐵板蠔仔蛋＄78

令我諗返起有少少似茶餐廳炒蛋，口感好軟滑，

不過裏面有好多粒細細隻嘅蠔仔，海水鮮味蓋過蛋味，

每一口都是濃郁的蠔味， 分量十足， 睇落好似落咗好多隻蛋。

菠蘿炒飯$58

之前去第二間泰國菜餐廳食菠蘿炒飯就有一個完整菠蘿，

大約＄98左右，依度平＄40但係就冇原隻菠蘿，

不過裏面嘅餡料都好相似，包括肉鬆、蝦仁、提子乾、紅蘿蔔、粟米。

當然唔少得嘅係一粒粒嘅菠蘿，甜香十足，

加埋啲提子乾同埋紅蘿蔔，口感更添豐富，

肉鬆同炒飯分開，令肉鬆保持乾身，吃下更美味。

最重要係蝦仁都好爽口，炒飯每一粒色澤均勻入味，性價比極高。

龍眼冰＄22

裏面的確有好多粒乾龍眼，加上蜜糖令整體飲料更甜，味道濃郁。

椰汁三色冰＄22

椰汁味好香，對比起之前食過嘅一間泰國餐廳好味好多，

雖然佢好香但係唔會太過濃郁，飲多唔會膩。

性價比高而且質素亦不錯，令人不妨再一嘗。

阿來泰式地道風味 

旺角通菜街97號地舖