—兔兔點評—傳統港式食物xCocktail專門店

環境方面:

如果想係比較舒服嘅地方食港式美食，又有Cocktail飲嘅話，黎呢度就冇錯喇！

餐廳主打港式傳統食物，而且有露天嘅地方比客人慢慢品嘗，一邊品嘗美食一邊喺輕快嘅western music之下互相傾計，完全可以將成個人放鬆，好舒服。如果唔太鍾意係室外地方享用，餐廳都有室內地方，設有好多港式裝飾，招牌嘅霓虹燈、拉制開關嘅綠色枱燈，再加上微微暗嘅燈光，將老香港融入係現代入面。

食物:

媚婦餐肉蛋三文治: ($88)

我會將佢形容為餐蛋治嘅進階版，最鐘意就係上面烘到恰到好處嘅嘉頓餐包，望住呢四個微微脹起嘅包有種好開心嘅感覺，又暖暖地仲要外層脆卜卜，咬落去好鬆軟。再配上半熟蛋同餐肉做主要食材，加上千島醬同洋蔥增加味道嘅層次，食落去有洋蔥嘅甜辣，更如開胃。

四川擔擔麵: ($58)

幼麵嘅份量頗多，仲有肉碎點綴。而且湯底夠辣之餘，都食到蔥嘅味道。

卡邦尼意粉: ($88)

雖然份量唔多，但已經好足夠，食落去一啲都唔膩同埋感覺幾清新，喺上面仲有一個流心蛋同芝士粉，蛋漿沾滿意粉食落去更加好味。

雙重滋味雞蛋仔: ($78)

雞蛋仔好脆身，味道較淡，所以上面加左朱古力醬、蜜糖，而且上面有一球雲尼拿雪糕，點咗醬同埋雪糕好似食緊waffle咁。仲加左啲煙肉粒，食落去咸咸甜甜咁，好特別，將傳統嘅雞蛋仔加入餐廳特色。

辦館 

銅鑼灣謝斐道535號 Tower 535 3樓302號舖