—兔兔點評—賣相味道都好掂＠帝王水產

今晚去到兆萬9樓嘅帝王水產食晚餐，一上到去覺得同好耐之前食過嘅神戶屋裝修好似，然後侍應着住神戶屋嘅T恤，先知道原來佢哋係姊妹公司。

相比之下，帝王水產有比較多嘅日式同泰式嘅料理，例如話冬陰公湯同日式蟹鍋等等都係喺其他放題好難食到嘅。

值得一讚嘅係日式蟹鍋入面嘅蟹非常之足料，亦都幾鮮甜吓。

最出色嘅就係燒牛舌，一嚟到見到好厚，都驚會好難咬，但係出乎意料地好腍，亦都好入味。

榴槤炸彈又係我另一個我覺得好驚喜嘅炸物，一嚟到熱辣辣嗰陣咬開又唔會成口油，但入面又有勁大舊榴槤果肉。

食物選擇真係非常多起碼都有20張紙，唔同種類嘅食物俾我哋選擇。食物質素亦都非常平均地好，必須要讚嘅係嗰盤切得好靚嘅刺身，刺身非常之新鮮同鮮甜，當日食飯post左張刺身相上Instagram，即刻有好多朋友問我係邊度食，因為賣相真係好掂。

同神戶屋一樣啲侍應都係非常之有禮貌同埋服務好好，周不時都會嚟問我地對食物有冇唔滿意、有冇漏單。當晚係無漏單、一樣嘢食都冇漏過嘅，上菜速度亦好快，必定會再去食😍

極上帝王水產
旺角西洋菜街1號兆萬中心9樓