尋日同同事因公事關係，去左葵涌近石蘺果邊見左個客，
做完嘢，已經係將近晚飯時間，同事提議不如搵吓附近有乜好嘢食吓hea吓，
行左一陣，見到對面馬路有間串燒店，咁就同同事提議不如一齊試吓啦。
入到餐廳，我哋就自己搵左個位坐低左。
由於係小店，老板娘親自出嚟同我哋介紹有乜好嘢食。
原先我哋係諗住食少少嘢，之後出返旺角再食，點知點吓點吓，
我哋就當埋晚飯咁點，點左好鬼死多嘢食，
最主要原因係因為個價錢實在係抵，同旺角差一節，
其次係老板娘太nice，我哋都想幫襯多啲。
點完嘢食，同同事一路吹吓水，一路等嘢食嘅。
其間我都有留意依間小店嘅格局，雖然店舖唔算好大，
不過係串燒店黎講其實已經好夠。
店嘅其中一邊牆有一幅幾特別嘅塗鴉，
我剛才係門口睇入去嘅時候都有留意到。
老板娘一路幫我哋準備食物嘅時候都有講佢哋主要做街坊生意，
特別係較夜嘅時候，生意最忙，有時多客到要係門口加枱先做得切所有客。
講講吓，嘢食黎啦！
第一道係老板娘重點介紹嘅燒原條茄子，
自問平時都有食開串燒，依條特別好味，
除咗調味做得好之外，茄子新鮮係主要原因。
我平時食肉唔食皮，今次都連皮食哂，
最後我哋仲即刻encore多一條。
之後黎嘅係芝士燒蠔同燒蒜蓉扇貝，
未食都聞到好香嘅蒜蓉味，蠔燒得幾適中，
唔乾，食落juicy，扇貝都好大隻，冇縮水，
再加埋蒜蓉入口，簡直係美食。
再黎係雞腎同韮菜。
雞腎燒得不錯，口感同味道都好ok，
我哋點左少辣，食落零舍醒胃香口。
韮菜，基本上係我串燒必叫之選，而依間餐廳整得唔錯，
好食之餘唔老，又唔算太油，抵讚！
同事叫左鰻魚，睇個賣相ok，可惜我唔係咁好鰻魚，
所以轉戰雞軟骨，我覺得我嘅選擇冇錯，一叫叫三串，
我一個人就清得哂，同事都話我誇張。
再接再勵，我同同事再點左雞中翼同金菇肥牛，
兩樣都係水準之作，特別是金菇肥牛，易咬，好食，老板娘冇介紹錯！
食得太多熱氣嘢，所以最後都叫返個芝士焗西蘭花，
平衡一吓(純粹自我安慰)，
再加埋支竹蔗茅根補補飛，降降火，
都算好彩，今日同事同我都冇失聲。下次有機會會再去。
多味吉
葵涌大隴街151號葵都大廈地下1號舖
沒有留言:
張貼留言