—兔兔點評—澳洲手打牛肉烤菠蘿芝士漢堡配粗薯條wow

​

本來約左朋友深水埗等，但對方臨時有建議，

於是去呢間身處荔枝角工業區附近嘅隱世食店。

出面睇落去普普通通既西餐廳款，但入到去，

牆上掛唔少懷舊相，幾有格調，而侍應都會成日幫手加水，幾好人。

當日餐湯為甘荀忌廉湯，幾濃郁既甘荀味再加上忌廉既幼滑，味道唔錯！

個人習慣餐包中間抹牛油，再搣成細細塊點餐湯。

呢間餐包新鮮出爐咁款，啲牛油抹完就好快就融，

散發住陣陣嘅餐包同牛油既香味，幾開胃！

同時，點咗份澳洲手打牛肉烤菠蘿芝士漢堡配粗薯條（$148），

唔想咁熱氣，於是特登加多份水牛芝士蕃茄沙律（額外＋28）。

上到枱先發現自己傻仔咗，因為呢份澳洲牛肉漢堡餐其實有包小份量既沙律，

於是，呢餐都好健康下。

漢堡個size大大份，牛肉肉汁零啥juicy，

再配搭埋酸酸甜甜既厚身菠蘿同埋芝士，

既唔會蓋過左牛肉本身既味道，亦都幾開胃，

呢種配搭其實幾惹味，值得一試。

至於份水牛芝士蕃茄沙律，沙律有蕃茄同羅勒葉，上面亦都淋咗意大利黑醋。

整體清新得黎又唔會覺得肥膩。

如果想食得健康啲，呢個沙律未嘗唔係一個推介。

食食吓口乾，望到有啲細細支既野飲，以為要加錢，

點知係唔洗嘅。叫咗檸檬汁，飲落真係好重檸檬味，

純粹味道黎講其實都幾唔錯既，但唔啱用黎止渴。

Pizza Piazza 

荔枝角長沙灣道883號億利工業中心地下1A舖

—兔兔點評—必試湯底：煮干醬油拉麵+半熟蛋

​

中午係灣仔有啲野做，所以都決定喺附近食啲嘢，

我都算係好鍾意食日本嘢嘅女仔，所以拉麵都係我必食之選。

依家香港地有好多唔同嘅拉麵店鋪，

每間拉麵店嘅質素着眼點都唔同，

有啲就着重拉麵湯底，或者拉麵本來嘅質素，

叉燒材料質素亦尤其重要。

煮干醬油拉麵$70+半熟蛋$11

平時嘅拉麵價錢大約係80幾蚊，

但係見到有一款係一日只能夠買20碗，

主打湯底用咗沙甸魚加埋醬油。

本身包咗一塊紫菜同埋一件叉燒，

湯底如果加上旁邊的柚子鹽和姜蓉，

反而會更加清甜好味。

未加

已加

如果唔加嘅話本身會更加又鹹香濃味。

叉燒其實都OK，不過唔算好入味或者好滑，變左唔係重點。

麵質也正正常常，賣點是湯底！

啲香蔥其實都可以算係重點，吊起成碗面嘅鮮味。

加埋個流心蛋真係一流，因為個蛋同出面嗰啲唔同，

起碼真係成隻但都好甜，有好多都係外面好鹹裏面好甜⋯

食過就知有幾滑！食呢度嘅拉麵一定要加！

綠茶$15

麺匠 真武咲弥 

灣仔春園街10號

—兔兔點評—皇家奇想曲鹹點甜點完勝

​

聖誕節一向都會有聖誕大餐，聖誕英式下午茶你聽過未？

如果未試過英式下午茶，呢個都係唔錯嘅選擇。

睇到之後既擺設好特別，有啲似去咗奇幻世界。

咩都未食之前首先飲一個有玫瑰花的薰衣草朱古力茶，

唔好以為個配搭好奇怪，其實好得意而且好好味非常匹配，

相信應該係用咗唔少時間鑽研出嚟嘅味道。

鹹點有好多款式，法國鵝肝醬+餅香脆之餘亦有咸香，表面有啲葵瓜子，增加豐富感。

英式肉醬肉丸薯蓉最特別，因為裏面有芝士之餘，

貢丸全部由豬肉造成，牛丸係100%牛肉，

之前消費者委員會先投訴過有好多牛丸真正嘅牛肉成份可能得十幾%，

依間令人有信心，唔會偷工減料或者溝其他肉類。

而且味道特別爽脆，裏面有好多空氣感。

芝士拼盤包括金文畢同埋Chatter Cheese，

前者比較有奶味後者就鹹香夠！

英式鬆餅配果醬，果醬用料比較清新唔會過甜，

而且鬆餅非常鬆化，小小甜味配搭一流。

沙樂美腸上面仲有啲黑胡椒，咸中帶辣，味道比較特別。

甜點擺設比較特別，首先有一個轉下轉下嘅旋轉小熊。

玫瑰朱古力心太軟表面有啲玫瑰同埋士多啤梨醬汁，

甜美比較清新而且裝飾美觀，心太軟裏面嘅醬汁一下子流出來，

表面鬆軟而且甜味不錯。

英國旗榛子馬卡龍冇認真食，俾咗我朋友，因為我對馬卡龍一般～

皇冠黑松露芝士蛋糕都算係最特別，

佢個芝士味同埋黑松露味配搭都唔錯，

食得出個黑松露級數比較高，喺其他地方食唔到。

皇室熊仔黑朱古力又係唔捨得食，

最尾帶咗返屋企影咗幾張相先同屋企人一齊分享。

最重要係享受中間嘅過程，可以抽返一款卡明白自己嘅心意同埋處境，寫在咭紙上實現願望。

最後幫手打卡Facebook同埋Instagram再踢埋朋友一齊抽奬，我就抽中左呢個香薰精油既頸鍊，順便用返以前買落嘅香薰精油滴係入面，香味好出！！

如果同情人或者三五知己同行嘆番個英式下午茶，其實都係繁華鬧市中間嘅一個小享受。

DK Cuppa Tea 

上環新街市街19號地舖

—兔兔點評—龍蝦包果然是主打

​

朋友講有一間餐廳嘅龍蝦包好好味，

於是放工之後就同三五知己聚舊，主要去食龍蝦包！

最尾叫咗個龍蝦包牛扒套餐$388，裏面首先有一個龍蝦包，

可以三選一間一款牛扒，我哋就揀咗肉眼牛扒8oz

龍蝦包上面已經有兩隻龍蝦鉗既肉，大大隻勁有肉地！

龍蝦包質感香脆，裏面亦都有好多龍蝦身部位，口感更加爽脆。

醬汁方面就有龍蝦殼加埋牛油等等嘅汁，香味滿溢。

的確係超水準之作，難怪個個都讚好。

龍蝦肉仲燒得夠香，唔點醬汁之前已經調得非常美味。

肉眼牛扒配想沙律菜同埋薯條，整體都幾豐富。

牛扒大大件而且厚肉！

切開之後裏面果然係六成熟，係我哋想要嘅落單熟度。

不過表面就燒得比較勁，所以會有啲啲燒味，影響不大。

裏面啲肉依然有好香嘅牛味，肉質算鮮嫩。

裏面雖然有少少粉紅色，某啲位置依然可以呢得出血水，

脂肪同埋肉連埋，食咗都唔會特別覺得肥膩。

一個套餐已經夠晒兩個人食，最主要係冇加一，

同平日嘅西餐店好唔同，兩個人食已經夠晒飽。

Hungry Lobster

銅鑼灣登龍街18號V Point地下3號舖

—兔兔點評—​正宗特色泰國菜

​

今晚1217係K小姐的生日，全家人當然要同佢慶祝！

佢就最鍾意食泰國嘢，一於訂枱身體東南亞餐廳。

分店有幾間，軒尼詩道分店係柴灣出發搭8P下車即來到！

裏面嘅泰國侍應真係好猛料，泰文了得之外廣東話亦了得。

落單主要係靠號碼，但係我講一次中文佢都一樣識聽。要任何服務完全冇難度。

而且地方好大，非常舒服，佔地全層。我哋多人所以就坐咗六人枱！

越式蝦米紙卷 $68

唔好睇佢個樣好似普通包粉，

其實裏邊有好多嘢食包括粉皮，紅蘿白、花生、炸蒜、粉絲、生菜⋯

出面個粉皮好煙韌，勁有口感，當然亦有硬梆梆的紅蘿蔔、

香粒花生和生菜，一咬就斷的粉絲和炸蒜，加上泰式酸辣汁更添口味。

馬沙文咖喱 羊肉 $98

味道同平時嘅咖喱相差唔算太遠，我都唔係太食到佢哋嘅分別，

以我食到少少辣嘅味蕾完全唔覺得佢有辣味，不過就好香嘅香料味。

裏面嘅羊肉有少少似牛腩感覺，有少少羊酥味幾香。

泰式甜品小拼盤＄88

總共有四款唔同嘅小甜品，每款有兩件，

椰汁西米糕裏面有啲豆，味道豐富唔會太甜！

椰汁千層糕比較暖身，好有彈性而且椰汁味道香濃。

有一個好有彈性嘅類似芒果糕，又係熱熱地。

最特別嗰個就好似大菜糕溝椰汁糕，中間仲有啲芒果，

口感爽口而且味道夠rich。

整體都好滿意，冇中伏！

新泰東南亞餐廳

灣仔軒尼詩道314-324號 W Square 2樓

—兔兔點評—​ ​ 「惹味」的味道大概來自全部味精

​

12月11日同屋企人睇完傢俬之後就去附近食少少野，

好耐都冇食過太興，而且下午茶價錢比較合理，

所以就入去坐。位置都幾大，環境舒適。

我就叫左一個

惹味排骨麵線＄46

裏面啲湯味好濃郁，好明顯落咗好重嘅味精，

排骨其實比較似牛肉？

麵線佢哋話係米線，不過食落就遲幼面同粗面中間，

有啲咬口，整體味道太濃郁肉類又過分入味。

好彩隔離有得自助飲水，熱水無限提供，可以沖淡啲味精利道。

如果講飲品來講，熱飲亦算不錯，可惜我哋來食嘢唔係飲嘢。

太興 

九龍灣宏照道38號MegaBox 10樓7號舖

—兔兔點評—​ 漠中一點綠洲

​

馬鞍山一向給人的印象是美食沙漠，這裏只有大集團食肆，

小食肆難以生存，所以每間食肆都大排長龍。

而今日就要介紹馬鞍山一點小綠洲-CJ café。

從朋友中得悉泳池傍的餐廳重開，飯聚時就決定嘗試。

當日7點半到，餐廳內仍未滿座，人客不多，所以也沒有太嘈吵的感覺。

餐牌設計得十分用心，而我們也選擇了三個套餐，侍應的態度也十分好。

落單之後很快也上菜。我們分別點了烤羊架拼長通粉、燒牛仔骨拼天使麵和雜菌意大利飯。

先說兩道扒菜，我食羊時最怕有 ＂蘇＂味，不過好彩完成沒有 ＂蘇＂味，

反而跟牛扒一樣不會太熟，入口還感受到濃濃的肉味，最適合我d食肉獸！

而雜菌意大利飯就好清新，中和到肉類的油膩感。

而天使麵同長通粉都十分入味，總結來說也十分不錯，非常推介大家去食！

飲品方面，店員介紹西柚冰茶，我們也試。

味道比一般凍檸茶好飲得多，而且西柚更可以當飯後果。

今餐晚餐唔使300，餐廳設計和氣氛優美，

我覺得是物超所值，在馬鞍山有這樣的餐廳是十分難得的，大家也值得一試。

CJ Cafe 

馬鞍山鞍駿街33號馬鞍山游泳池餐廳

—兔兔點評—遠離塵囂嘅What The Food Café

​

今個星期六趁住港鐵半價優惠，晏晝3點兩個人走到粉嶺想試試呢間café。

由港鐵站行去café大概15分鐘左右，沿途一片綠油油，

整個路程係星期六下午顯得格外愜意。

Café位於多利工業大廈一樓，跟住GOOGLE MAP就認到路身為路癡嘅我都無問題。

入到CAFÉ個感覺好開揚同休閒，入面暖黃色燈光加上午後陽光非常舒服。

建議大家去到如果有窗口位一定要坐，因為個景其實都唔錯。





係等野食嘅時間可以欣賞下呢度d裝飾

 

等左五分鐘左右，就有跟餐嘅例湯同面包。

當日嘅係羅宋湯同一個芝麻包，羅宋湯嘅味道唔錯，用料都好有誠意。

而面包係一個surprise黎，無諗到會一個幾特別嘅餐包，好香好軟熟。



香味橫溢嘅芝麻包

羅宋湯酸甜開胃，加上有少少肉係入面絕對有誠意。

 

之後黎到係兩杯沙冰，我個杯焦糖脆脆咖啡沙冰賣相已經好吸引。

佢嘅咖啡味唔係太濃反而焦糖味好突出唔會有咖啡個種苦澀味，

而上面嘅脆脆好似年宵會買到嘅叮叮糖，連埋沙冰一齊食令鍾意食甜野嘅我好滿足。



好清新嘅沙冰，夏天飲應該更加舒服

 

最後黎到正餐，大家先睇下賣相。

另一樣就係蒲燒鰻魚蛋包飯（$76），相信很多黎呢間CAFÉ嘅朋友都係為左食呢個蛋包飯。

而小編都係一個鰻魚控，所以我地先講講鰻魚。

三個字：香、滑、濃。鰻魚燒得岩岩好熟令到肉質很鮮嫩，

再加上燒汁令到整個鰻魚我感到很超值。

而且份量十分足夠，外面食一個差不多的鰻魚飯要100左右。

蛋包飯十分入味而且是用珍珠米，粒粒都覆蓋住燒汁同蛋。



可以睇到粒粒飯都係蓋滿汁

 

呢間CAFÉ好適合大家黎呢度消磨一下週未嘅午後時光，

環境同食物都不錯，而且店員都唔會趕人。

比個提示大家，因為食物嘅份量都食到好飽，

如果同行有比較細食嘅女仔可以考慮叫一個主菜同一個甜品。

而由於果日食得太飽所以無試到佢地嘅甜品，

不過都見有其他人叫左佢地嘅homemade cheesecake 賣相都很不俗。

What The Food Cafe 

粉嶺業豐街13號多利工業大廈1樓F室