—兔兔點評—非凡小廚. 非同凡響？

​

呢間餐廳有好大個招牌，係遠遠都望到，好易搵！

餐廳唔係好大間，有一張大台可以坐到10人左右，

淨返個啲就係坐到幾個人既細台。

如果多啲人食要訂先得，不過我地平日去到都有幾多位淨

店員話餐牌唔夠位寫曬所有菜色，

牆邊都貼有其他菜單可以揀

啲野食係即叫即整，等左陣先上菜，

上台個陣熱辣辣，仲出緊煙。

甘蠔生菜包

有7-8片生菜，生蠔係碎上，仲有臘腸等等。

包住一齊食，個口感好豐富，而且咸香味重，

蠔味濃，令人食完一舊又一舊

腐乳通菜

呢道菜望落好似好普通，但食落仲好食過酒樓個啲！

啲調味好正，唔會太咸，岩岩好！

八珍豆腐煲

入面有好多配料，魷魚，蝦球，豆腐，豬肚等等。

要讚下個豬肚，好爽口，唔會咬極都咬唔開！

而啲汁會沉底，撈返上去先好食

PS啲茶幾好飲，所以我地不停飲，個店員就不停幫我地加水～

非凡小廚 

地址 土瓜灣北帝街22號地下

—兔兔點評—沁沁麫 Double Hearts For Noodle

​

朝早早餐食得太heavy搞到lunch 食唔落，

到左tea time又有啲肚餓，就去左揾下有無麵食。

行行下畀呢間野吸引左，有本土味道，

啲麵有特色，仲有小食可以嗌，唔同一般麵鋪。

加埋去到時間尚早，無乜人同學生，

可以舒舒服服食個tea，就決定入去。

近排熱氣野食太多就叫左杯果漢果茶飲，

好貼心咁有得揀凍、熱同常温，加分! 

我就叫左凍，飲落超羅漢果，同媽媽煲既味差唔多。

叫左招牌沁沁麵，果然無令我失望。

有我最愛既溏心蛋😍煮得岩岩好😍 

仲有木耳、西蘭花、杞子一堆超有營養既配菜，

我近排無乜食菜，岩哂。

成個麵聞落好香，有啲似韓國食過啲藥膳煲，

啲麵吸收哂啲精華，食落係勁香人參味。

麵店少有醉雞賣，我見平平地就叫黎試下，

本來都無乜大期望，點知黎到有驚喜。

有紅棗杞子,估唔到仲有人參。

 醉雞食落勁香勁有酒味，

雞肉嫩同去左骨，方便我啲懶人食。

芝士控口痕忍唔住叫左個蜜糖芝士雞鎚，
皮脆肉嫩，蜜糖份量落得岩岩好，
芝士係半熔狀態，食落味道好夾又甜而不膩，
一份4件我食哂都無罪惡感😛。

沁沁麫 Double Hearts For Noodle
地址 西灣河西灣河街112號地下

—兔兔點評—快樂的貓貓樂園

​

上網睇到尖沙咀有間cafe幾靚，仲有貓貓玩，

於是放學就同朋友上去試下。

一入到去，間cafe佈置得幾清新優雅，係打卡嘅好地方！

我地叫咗兩份主食一份小食。

見到menu推薦黑松露鵝肝意大利飯，於是我就決定試下，仲叫咗一杯芒果綠茶。

而朋友就嗌咗炭燒虎蝦扁意粉同埋榛子朱古力，

再叫埋芝士豬肉釀雞翼！夠曬豐富。

先講下黑松露鵝肝意大利飯，黑松露都幾多，好香，

未食離遠都聞得到黑松露味。

鵝肝表面煎到金黃，好香口，

咬入口有融化係條脷嘅感覺，真係幾好味，

中意鵝肝嘅朋友可以試下。

而虎蝦意粉好濃茄汁味，唔會揸流攤，

而且兩隻虎蝦大大隻，焗到好香脆，

仲要脫殻好方便食！正！

再飲埋杯朱古力更濃郁，偏甜。

我中意芒果綠茶，顔色好靚，好fresh！

當然唔少得係一黑一白嘅貓貓！

好得意好cute，仲唔怕生可以摸下影下相。

下次會再去探佢地！

樂園 

地址 尖沙咀北京道65-69號環球商業大廈2樓205-06室